Alþýðusamband Íslands sendir Seyðfirðingum samúðar- og stuðningskveðjur eftir hamfarir síðustu daga. Fram kemur í tilkynningu frá ASÍ að sambandið hafi í dag styrkt björgunarsveitina Ingólf og Rauða krossinn með fjárframlögum.
„Við hugsum til fallega bæjarins og ekki síður hins einstaka mannlífs, menningar og sköpunar sem einkennt hefur bæjarfélagið. Við höfum í dag styrkt Björgunarsveitina Ingólf og Rauða krossinn með fjárframlögum og hvetjum aðra til að gera slíkt hið sama. Stöndum saman og leggjum okkar lóð á vogaskálarnar til að létta þungum byrgðum af félögum og vinum fyrir austan,“ segir í tilkynningunni.