Lítil sem engin úrkoma hefur fallið á Seyðisfirði síðustu klukkutímana og svo virðist sem rigningartímabilinu þar sé að ljúka.
Úrkoman hefur numið tveimur til þremur millimetrum síðustu tímana en þremur til fjórum millimetrum síðasta sólarhringinn.
Að sögn veðurfræðings hjá Veðurstofu Íslands kólnar í kvöld og fram á morgundaginn fyrir austan og búist er við lítilsháttar snjó. Best er að bíða með að draga ályktanir af veðrinu í tengslum við hættu á aurskriðum þangað til skriðusérfræðingar hafa metið stöðuna í birtingu.
Í gær var greint frá því að 305 íbúar hefðu snúið til síns heima á Seyðisfirði en 276 íbúar bíða þess enn. Hættustig er í bænum vegna skriðuhættu.
Ofanflóðasérfræðingar Veðurstofu Íslands hafa, ásamt samstarfsaðilum, metið hættu á frekari skriðuföllum á tilteknum svæðum á Seyðisfirði og gildir áfram rýming um þau.