Morgunblaðið | 22.12.2020 | 18:29

Fellst á tillögu Bankasýslu ríkisins

Bjarni Benediktsson, fjármálaráðherra. mbl.is/Kristinn Magnússon

Fjármála- og efnahagsráðherra hefur útbúið greinargerð um ráðgerða sölumeðferð á hlutum ríkisins í Íslandsbanka í samræmi við ákvæði laga. Bjarni Benediktsson fjármálaráðherra fellst þar með á tillögu Bankasýslu ríkisins um að undirbúningur verði hafinn að söluferli Íslandsbanka.

Bankasýslan lagði í síðustu viku fram tillögu til fjármála- og efnahagsráðherra um að hefja sölumeðferð á eignarhlutum ríkisins í Íslandsbanka hf. Lagði stofnunin einnig fram samhliða minnisblað til stuðnings tillögunni.

Frétt af mbl.is

Vill selja fyrir nokkra tugi milljarða

Bjarni hafði áður greint frá því í samtali við mbl.is að honum hugnaðist að sölumeðferð verði hafin á eignarhlut ríkisins í Íslandsbanka. Hann vill að ríkið selji fyrir nokkra tugi milljarða í bankanum áður en kjörtímabilinu lýkur, en segir að til lengri tíma hljóti markmiðið að vera að selja allan eignarhlut ríkisins.

Greinagerð fjármálaráðherra og fylgigögn hafa verið send fjárlaganefnd og efnahags- og viðskiptanefnd Alþingis og þess óskað að umsagnir nefndanna liggi fyrir eigi síðar en þann 20. janúar 2021.

Helstu markmið með sölu ríkisins á hlutum í bankanum eru eftirfarandi:

að minnka áhættu ríkisins af svo stórum eignarhlut í fjármálakerfinu;
að efla virka samkeppni á fjármálamarkaði;
að hámarka endurheimtur ríkissjóðs af eignarhaldinu og sölu á hlutum;
að stuðla að fjölbreyttu, heilbrigðu og dreifðu eignarhaldi til lengri tíma;
að auka fjárfestingarmöguleika fyrir innlenda einstaklinga og fagfjárfesta; og ekki síst
að minnka skuldsetningu eða auka svigrúm ríkisins til samfélagslega arðbærra fjárfestinga.