Morgunblaðið | 25.12.2020 | 16:38 | Uppfært 17:59

Rýming endurskoðuð eftir helgi

Frá Seyðisfirði eftir skriðuföllin. mbl.is/Eggert Jóhannesson

Hættustig almannavarna er enn í gildi á Seyðisfirði og rýming að hluta í gildi vegna skriðuhættu en rýmingin verður endurskoðuð 28. desember. Áfram er fylgst með aðstæðum ofan Eskifjarðar.

Þetta kemur fram í tilkynningu frá almannavarnadeild ríkislögreglustjóra og lögreglustjóranum á Austurlandi.

Síðasta sólahring var fylgst sérstaklega vel með aðstæðum á Seyðisfirði vegna hlýinda sem gengu yfir. Engar tilkynningar bárust um skriður eða drunur. Þá sýndu mælingar í morgun að lítil sem engin hreyfing hefði orðið á upptakasvæðum skriðufalla frá því í gær.

Á morgun verður kalt, en búast má við hríðarveðri sem færist yfir í rigningu með 15-20 m/s á sunnudag, 27. desember. Um kvöldið kólnar aftur með snjókomu. Að þessum sökum mun endurskoðun á rýmingarsvæðinu ekki fara fram fyrr en á mánudaginn 28. desember og niðurstöðu má vænta seinni part mánudags.

Fylgjast vel með málum á Eskifirði

Veðurstofa Íslands hefur ásamt samstarfsaðilum sett upp vefmyndavél sem beint er að sprungum sem mynduðust í gamla Oddsskarðsveginum fyrir ofan Eskifjörð í síðustu viku.

Auk þess eru fastpunktar mældir einu sinni á dag til þess að athuga hvort vart verði við hreyfingar í hlíðinni. Það er gert til þess að geta brugðist við ef aðstæður breytast á næstu dögum. Síðustu mælingar benda þó til þess að allt sé með kyrrum kjörum.