Morgunblaðið | 26.12.2020 | 16:59 | Uppfært 31.12.2020 2:43

Gæti minnkað stöðugleikann

Lægðin sem nú gengur yfir getur skapað óstöðugleika í jarðlögum á Austfjörðum. Hættustig er þar enn í gildi. mbl.is/Eggert Jóhannesson

Lægð sem gengur nú yfir landið gæti skapað óstöðugleika á Austfjörðum þar sem nú er í gildi áhættustig vegna skriðuhættu.

Veðurstofa Íslands gaf í dag út gula viðvörun fyrir allt land fyrri partinn á morgun, en áður náði viðvörunin bara til norður- og austurhluta landsins.

„Það er úrkomuviðvörun á Austfjörðum og það er alltaf þannig að þegar þiðnar er aukin hætta á skriðum. Það er enn í gildi hættustig, því auðvitað þegar þiðnar í þessu minnkar stöðugleikinn,“ segir Eiríkur Örn Jóhannesson, veðurfræðingur Veðurstofu Íslands.

Frétt af mbl.is

Rýmingar endurskoðaðar eftir helgi

Samkvæmt uppfærðri viðvörun Veðurstofu má nú gera ráð fyrir norðanstormi 20-25 m/s á Faxaflóa og við Breiðafjörð og að vindur fari upp í 30 m/s í hviðum. Þá er gert ráð fyrir 20-28 m/s á Suðausturlandi og að búast megi við mjög snörpum vindhviðum við fjöll yfir 35 m/s, einkum í Mýrdal og í Öræfum. Tekið er fram að slíkar hviður geti verið hættulegar fyrir vegfarendur.

Í öðrum landshlutum er gert ráð fyrir 15-28 m/s.

Frétt af mbl.is

Gul viðvörun fyrir allt land í nótt og á morgun

Viðvörunin tekur gildi seint í kvöld, en færist svo um allt land snemma í nótt og fram á morgun. Um hádegi á morgun nær hún um allt land, ef frá er talið höfuðborgarsvæðið.

„Þetta er í rauninni sama lægðin og skaffaði éljaganginn og snjóinn sem er núna. Hún dregur fyrst til okkar hlýtt og rakt loft á láglendi til að byrja með en svo kólnar í henni í norðanáttinni og þá verður þetta meira snjókoma. Hún verður svolítið kröpp fyrst og mikill vindur. Þetta er bara svona vetrarlægð,“ segir Eiríkur.

Veðurvefur mbl.is