Morgunblaðið | 6.1.2021 | 10:22

Hafís í Grænlandssundi hamlar loðnumælingu

Myndin er tekin við kantinn utan við Barðagrunn um borð í rannsóknaskipinu Árna Friðrikssyni klukkan níu í dag. Ljósmyn/Hafrannsóknastofnun/Sigurður Jónsson

Gert er ráð fyrir að skipin fimm sem nú eru við loðnumælingar takist að fara yfir allt yfirferðasvæðið í þessari viku, að því er fram kemur í færslu á vef Hafrannsóknastofnunar. Þar segir að hafís nálægt landi í Grænlandssundi muni hamla mælingum þar.

„Í framhaldi af heildar yfirferðinni verða næstu skref ákveðin, meðal annars með tilliti til hvort reynt verði að ná annarri umferð sem getur gefið minni óvissu á mælingunum eða hvort hafís hafi hörfað eitthvað frá landi,“ segir í færslunni.

Staðan leiðangursins að morgni 6. janúar. Skjáskot

Það voru fimm skip sem héldu á miðin til mælinga á mánudag. Rannsóknaskipin Árni Friðriksson og Bjarni Sæmundsson og uppsjávarveiðiskipin Aðalsteinn Jónsson SU, Ásgrímur Halldórsson SF og Polar Amaroq.

Hægt er að fylgjast með yfirferð þeirra í rauntíma hér.