Allir þeir sem þurftu að rýma heimili sín á Seyðisfirði í gærkvöldi fengu húsnæði í bænum, og því hefur enginn þurft að leita til fjölskylduhjálparstöðvarinnar í Herðubreið á Seyðisfirði.
Þetta herma upplýsingar þjónustumiðstöðvar Almannavarna á Seyðisfirði.
Eins og áður hefur komið fram ákvað lögreglustjórinn á Austurlandi, í samráði við Veðurstofu og ríkislögreglustjóra, að rýma ákveðin svæði á Seyðisfirði vegna úrkomuspár.
Um 70 hús voru rýmd og gekk rýmingin afar vel, en henni lauk klukkan 22:00 í gærkvöldi. Enn er mikil rigning á Seyðisfirði, en rýmingin verður endurskoðuð í fyrramálið.