Morgunblaðið | 26.1.2021 | 12:45 | Uppfært 13:06

Heimilar veiði á 61 þúsund tonnum af loðnu

Kristján Þór Júlíusson sjávarútvegsráðherra segir ánægjulegt að tekist hefur að afstýra loðnubresti þriðja árið í röð. mbl.is/Eggert Jóhannesson

Kristján Þór Júlíusson, sjávarútvegs- og landbúnaðarráðherra, hefur í samræmi við ráðgjöf Hafrannsóknastofnunar undirritað reglugerð um veiðar á loðnu sem felur í sér heimild til veiða á 61.000 tonnum af loðnu á vertíðinni 2020/2021.

Þetta kemur fram á vef Stjórnarráðsins. Þar segir að um sé að ræða 39.200 tonna aukningu frá fyrri ráðgjöf.

Frétt af mbl.is

Hækka loðnuráðgjöf eftir að villa fannst

„Það er mjög ánægjulegt að tekist hafi að afstýra að loðnubrestur myndi raungerast þriðja árið í röð. Þetta er vissulega ekki mikið magn en sú staðreynd að íslensk skip munu nú halda til veiða á loðnu er skref í rétta átt. Leitin heldur áfram af fullum þunga og í dag bætast þrjú skip við í þá leit. Það er enda mikið í húfi fyrir viðspyrnu efnahagslífsins að loðnuvertíðin verði eins öflug og kostur er,“ segir Kristján Þór.