Morgunblaðið | 29.1.2021 | 9:33

Eldi í Önundarfirði fimmfaldað

Flateyri. mbl.is/Sigurður Bogi

Tíðindi urðu fyrr í mánuðinum fyrir fiskeldisfyrirtækið ÍS 47 ehf. þegar Matvælastofnun (MAST) gaf út stækkað rekstrarleyfi sem fimmfaldar leyfilegt eldismagn félagsins í Önundarfirði. Fyrir var Gísli Jón Kristjánsson, eigandi fiskeldisfyrirtækisins, með heimild til sjókvíaeldis á 150 tonnum af þorski og 50 tonnum af regnbogasilungi en hefur nú 1.000 tonna hámarkslífmassa af regnbogasilungi og þorski.

„Ég er bara mjög bjartsýnn á að þetta sé að takast hjá mér. Mjög ánægjulegt að leyfið sé komið þó það hafi tekið tíma, en það er bara eðlilegt eins og staðan er í dag eins og lög og reglugerðir eru,“ segir Gísli, en umsókn um nýtt rekstrarleyfi var móttekin af MAST 23. mars 2015.

Stefnt að frekari stækkun

Spurður hver séu næstu skref í kjölfar nýs rekstrarleyfis svarar hann: „Það er verið að leita að fjármagni í uppbyggingu og það er stefnt að útsetningu seiða í vor. Líklega gæti þetta verið tvö til þrjú ár þangað til að maður er búinn að fylla upp í þetta leyfi, en svo verður farið í það að óska eftir stækkun í 2.500 tonn þar sem búið er að stækka burðarþolið í firðinum. Vonandi tekur það styttri tíma að fá það leyfi.“

Gísli Jón Kristjánsson. Ljósmynd/Aðsend

Fyrirtækið hefur lagt áherslu á eldi regnbogasilungs og þorsks. Kostur regnbogasilungs hefur verið að Hafrannsóknastofnun og Skipulagsstofnun hafa verið sammála um að lítil hætta stafi af slysasleppingum þar sem hrygnuseiði regnbogasilungs eru ekki talin geta tímgast í íslenskum ám. Þá er þorskurinn í sjókvíunum villtur og ekki séð að hætta fylgi því að hann kunni að sleppa.

Það er óhætt að segja að leyfisveitingin hafi för með sér töluverðar breytingar fyrir reksturinn en Gísli hefur til þessa séð sjálfur um að sækja fiskinn í kvíar, slátra honum og slægja. Starfsmenn hafa verið frá tveimur og upp í fimm, allt eftir álagi.

„Ég sé það alveg fyrir mér, ef mér tekst það á þessum stutta tíma, að ég set út seiði í vor og þá stefni ég að því að ráða fleiri starfsmenn en eftir því hversu mörg seiði verða sett út. Það tekur að vísu átján mánuði fyrir stofninn að komast í sláturstærð, en þetta mun hafa góð áhrif,“ segir Gísli og vísar til þess að Byggðastofnun hafi fyrir nokkru metið það svo að fyrir hver þúsund tonn af eldisfiski verða til tíu til tólf störf.

Frétt af mbl.is

Væri ekki óskastaða að skipta yfir í lax

Fjölgar stoðum

Hann telur fiskeldi mikilvæga viðbót í flóru atvinnulífsins og segir það fjölga stoðum samfélagsins.

„Þetta eykur fjölbreytnina á Flateyri, í Önundarfirði og á Vestfjörðum. Eldið er vopn okkar Vestfirðinga og Austfirðinga núna. Þetta er allt mjög gleðilegt og svo eru vísbendingar um að eitthvað sé að gerast í Djúpinu. Við erum bara bjartsýn hérna fyrir vestan,“ segir hann. „Það er kraftur í fólki bæði hér fyrir vestan og fyrir austan. Ef við bara fáum að nýta þau tækifæri sem við höfum þá komumst við áfram,“ bætir Gísli við að lokum.