Morgunblaðið | 29.1.2021 | 8:41 | Uppfært 11:24

Guðmundur endurráðinn forstjóri Brims

Guðmundur Kristjánsson hefur verið endurráðin forstjóri Brims en hann er jafnframt stærsti hluthafi félagsins. mbl.is/Kristinn Magnússon

Guðmundur Kristjánsson, stjórnarmaður og fyrrverandi forstjóri Brims, hefur verið endurráðinn sem forstjóri félagsins, að því er fram kemur í tilkynningu á vef fyrirtækisins. Hann er eigandi Útgerðarfélags Reykjavíkur sem fer með 34% hlut í Brimi.

Guðmundur sagði starfi sínu lausu í apríl í fyrra og hefur Kristján Þ. Davíðsson, stjórnarformaður, gegnt hlutverki forstjóra frá þeim tíma.

Frétt af mbl.is

Guðmundur hættur sem forstjóri Brims

„Við hjá Brim erum ánægð með að fá Guðmund aftur til starfa. Guðmundur býr yfir gríðarlegri reynslu og hefur skýra framtíðarsýn á rekstur sjávarútvegsfyrirtækja,“ er haft eftir Kristjáni í tilkynningunni.

„Það er ánægjulegt að vera kominn aftur til starfa. Ég hef nýtt tímann vel og kem fullur krafts og tilhlökkunar til starfa. Við höfum séð að þegar aðstæður í efnahagslífinu verða erfiðar, eins og síðustu misseri, að sjávarútvegur er burðarstólpi í íslensku samfélagi og við hjá Brim munum leggja okkar af mörkum til þess að svo verði áfram. Brim stundar ábyrgar veiðar og vinnslu enda er það grundvöllur fyrir því að tryggja til framtíðar trausta atvinnu og byggð á Íslandi“ segir Guðmundur.