Morgunblaðið | 30.1.2021 | 17:06

Litla loðnu að finna á grunninu norðvestanverðu

Hákon EA 148 að koma í land eftir snarpa loðnuleit. mbl.is/Þorgeir

„Árni Friðriksson og Bjarni Sæm eru ennþá úti að mæla, svo að mælingin er ekki búin. Heilt yfir hefur gengið vel, við náðum að dekka svæðið sem við ætluðum okkur. Átta skip hafa verið bæði í mælingu og leit,“ segir Birkir Bárðarson líffræðingur hjá Hafrannsóknastofnun í samtali við mbl.is í dag.

Frétt af mbl.is

Allir að bíða með öndina í hálsinum

Ásgrímur Halldórsson SU, Bjarni Ólafsson AK, Árni Friðriksson HF, Hákon EA, Bjarni Sæmundsson HF, Aðalsteinn Jónsson SU, Jóna Eðvalds SF og Börkur NK hafa öll tekið þátt í loðnuleit og loðnurannsókn undanfarið.

Hákon að leggjast að Akureyrarhöfn í dag. mbl.is/Þorgeir

Hákon EA kom til hafnar í dag eftir snarpa loðnuleit á grunnsvæði fyrir Norðvesturlandi.

„Hákon notuðum við sem leitarskip á landgrunninu fyrir Norðvesturlandi og á því svæði var lítið að sjá eins og er.“

Birkir segir nokkuð af ungloðnu hafa fundist á vesturhluta leitarsvæðisins, við Grænlandssund, sem þá verður uppistaðan í næstu vertíð.

„Það má segja að vestan við Kolbeinseyjarhrygginn hafi verið svolítið af ungloðnunni, meira eftir því sem vestan dregur.

Heilt á litið vorum við að klára núna þessa yfirferð frá Litla dýpi fyrir Austurlandi og fyrir öllu Norðurlandi og allt vestur að Víkurál úti fyrir Vestfjörðum. Þessa mælingu skoðum við síðan í samhengi við okkar fyrri mælingar og fáum þannig heildarstofn sem við gefum svo ráðgjöf út frá.“