Morgunblaðið | 3.2.2021 | 5:30 | Uppfært 8:04

Hátt verð fyrir íslensku loðnuna

Vendla var fyrst norsku skipanna til að tilkynna afla.

Margir buðu í afla norska loðnuskipsins Vendlu, sem kom á miðin austur af landinu um helgina. Fiskeribladet/Fiskaren greindi frá því í gær að aflinn, 435 tonn, hefði verið seldur á 4,2 milljónir norskra króna eða fyrir 9,61 krónu á kíló.

Í íslenskum krónum gerir þetta rúmlega 63 milljónir fyrir farminn og 145 krónur á kíló.

Segir í fréttinni að fyrirtæki víða í Noregi hafi boðið í aflann og hann hafi á endanum verið seldur á mun hærra verði en búist var við. Kaupandinn er Lofoten Viking í Værøy. Engar loðnuveiðar hafa verið við Ísland né í Barentshafi síðustu tvö ár og er því mikil spurn eftir loðnuafurðum.

Aflinn fékkst í nót rétt norðan við línu sem dregin er í austur frá punkti sunnan Álftafjarðar, en sunnar mega Norðmenn ekki veiða, að því er fram kemur í Morgunblaðinu í dag.