Leit hófst að nýju í morgun að John Snorra Sigurjónssyni, Pakistananum Muhammad Ali Sadpara og Juan Pablo Mohr frá Chile. Aðstæður eru erfiðar til leitar á K2 vegna slæms veðurs á fjallinu. Tvær þyrlur pakistanska hersins tóku þátt í leitinni en urðu frá að hverfa.
Björgunarfólk bíður nú eftir að nýr veðurgluggi opnist til leitar að sögn sjerpans Chhang Dawa sem tekur þátt í leitinni.
Fjallgöngumennirnir misstu samband við grunnbúðir á föstudag og var gefið út á laugardag að þeirra væri saknað.
Nokkrir sérfræðingar, þar á meðal þrautþjálfaðir innlendir fjallgöngumenn, Imtiaz Hussain og Akbar Ali frá borginni Skardu, Rúmeninn Alex Găvan, auk Nazir Sabir, Chhang Dawa og fleiri úr teymi Seven Summit-fjallaferðaskrifstofunnar (SST), taka þátt í leitinni.
Undanfarna þrjá daga hafa flugmennirnir unnið þrekvirki en því miður hefur ekkert fundist sem bendir til hvar þremenningana er að finna segir sjerpi, Chhang Dawa, sem tók þátt í leitinni í morgun.
Ali Asghar Porik, sem stýrir Jasmine Tours, segir að til þess að það sé hægt að leita á þyrlum á K2 þurfi að vera gott skyggni í fjórar klukkustundir.
Það taki þyrlurnar 40 mínútur að fljúga að grunnbúðum frá Skardu. Þegar komið er í 5 þúsund metra hæð fari veður að versna og um leið er það óútreiknanlegt í svo mikilli hæð. „Það þarf að vera gott skyggni á fjallinu því að öðrum kosti er ekki hægt að halda leit áfram,“ segir Porik.
Pakistanski vefurinn Dawn segist hafa heimildir fyrir því að sjerparnir séu að taka saman föggur sínar í grunnbúðum og að kanadíski kvikmyndagerðarmaðurinn Elia Saikaly og fjallgöngumaðurinn Pasang Norbu séu farnir með þyrlu til Skardu. Þar er aftur á móti búnaður fyrir aðra, svo sem gervihnattasími og fleira.
Saikaly hefur verið í grunnbúðum í rúmar tvær vikur en hann er að gera heimildarmynd um tilraun Johns Snorra og Sadpara-feðganna til að sigra tind K2 að vetri til.
Sajid Sadpara, sonur Ali Sadpara, sem var hluti af leiðangrinum varð að snúa við þegar hann lenti í vandræðum með súrefni auk þess sem honum leið illa andlega þegar þeir voru komnir í yfir 8.200 metra hæð. K2 er 8.611 metrar að hæð og einn erfiðasti farartálminn af mörgum er ísveggurinn Bottleneck skammt fyrir neðan tindinn.
Sajid lýsti uppgöngunni fyrir blaðamönnum í gær þegar hann kom til Skardu. Að hans sögn hófu þeir uppgönguna skömmu fyrir miðnætti (klukkan 19 á íslenskum tíma) 5. febrúar. „Ég, faðir minn Ali Sadpara, John Snorri og JP Mohr, vorum við Bottleneck en aðrir fjallgöngumenn höfðu snúið við,“ sagði Sajid. Hann sneri við í búðir 3 þegar súrefniskútur hans fór að leka.
Það var um hádegi að pakistönskum tíma á föstudeginum sem Sajid sneri við og kom í búðir 3 um klukkan 17. Honum tókst ekki að komast í samband við fjallgöngumennina þar sem samskiptatæki þeirra voru óvirk. Um nóttina beið hann þeirra í búðunum og gætti þess að hafa kveikt ljós þannig að þeir myndu ekki missa af búðunum þegar þeir kæmu niður.
Á laugardagsmorgninum var Sajid ráðlagt af stjórnanda grunnbúða að reyna ekki að hefja leit að þremenningunum vegna veðurútlits og halda frekar niður á við enda búinn að vera í yfir 8 þúsund metra hæð í tvo sólarhringa. Hann kom síðan í grunnbúðir á laugardagskvöldinu.
Karrar Haideri hjá pakistanska alpaklúbbnum staðfesti í samtali við Dawn.com áðan að reynt hefði verið að leita í morgun án árangurs. Vegna veðurs væru aðstæður til leitar mjög erfiðar.
Sjerparnir Chhang Dawa og Lakpa Dendi voru sóttir af áhöfnum herþyrlna í morgun en þurftu að snúa við aftur í grunnbúðir. Tvær herþyrlur hafi tekið þátt með aðstoð hersveitar í flugher Pakistans. Þyrlunum hafi verið flogið yfir svæði þar sem búist er við að fjallgöngumennirnir séu. Lítið skyggni hafi verið þegar ofar dró og skýjahula yfir fjallinu.