Morgunblaðið | 12.2.2021 | 8:55 | Uppfært 10:07

DNB ekki ákærður vegna viðskipta við Samherja

Höfuðstöðvar DNB í Ósló í Noregi. Bankinn segir ekkert saknæmt hafa fundist við rannsókn á viðskiptum hans við Samherja og hefur ríkissaksóknari þar ytra látið málið niður falla. Ljósmynd/DNB

Norski viðskiptabankinn DNB verður ekki ákærður í tengslum við viðskipti sín við Samherja og meint brot fyrirtækisins í Namibíu.

Saksóknari í Ósló hefur látið málið falla niður er kemur fram í norska miðlinum E24 í dag.

Fram kemur í tilkynningu frá DNB-banka að rannsókn á hendur þeim hefur „ekki leitt neitt saknæmt í ljós sem leitt gæti til ákæru á hendur einstaklingum“ og málið gegn bankanum því látið niður falla.

Einnig kemur fram í tilkynninu frá bankanum að gott samstarf hafi verið með honum og efnahagsbrotadeild lögreglunnar í Ósló þar sem öll viðeigandi gögn hafa verið látin af hendi.

Saksóknari hefur lokið rannsókn sinni á starfsemi bankans sem hófst haustið 2019 vegna viðskipta hans við íslenska sjávarútvegsfyrirtækið Samherja. Saksóknari telur ekki tilefni til að aðhafast frekar vegna málsins.