Morgunblaðið | 12.2.2021 | 20:32

Þakka Kristjáni Þór fyrir skjót viðbrögð

Kristján Þór Júlíusson, sjávarútvegs- og landbúnaðarráðherra, hefur undirritað breytingu á reglugerð sem tryggir áframhaldandi línuívilnun út maímánuð. mbl.is/Kristinn Magnússon

„Ráðherra er hér með þakkað fyrir að bregðast svo skjótt við og koma þannig í veg fyrir að línuívilnun falli niður,“ segir í færslu á vef Landssambands smábátaeigenda og er vísað til þess að Kristján Þór Júlíusson, sjávarútvegs- og landbúnaðarráðherra, hefur framlengt línuívilnun.

Kristján Þór hefur hefur undirritað reglugerð um breytingu á gildandi reglugerð um línuívilnun og afturkallar breytingin fyrri ákvörðun um að línuívilnun falli niður frá og með deginum í dag.

Ekkert rof verður á línuívilnunni vegna þessa, en breytingin felur í sér að annað tímabil hafi liðið undir lok 11. febrúar og að í dag hefjist þriðja tímabil sem gildir út maí.