Morgunblaðið | 5.3.2021 | 13:48 | Uppfært 14:21

Áslaug tilkynnti kaup á varðskipinu Freyju

Áslaug Arna Sigurbjörnsdóttir, dómsmálaráðherra, og Georg Lárusson, forstjóri Landhelgisgæslunnar, kynntu í dag áform um kaup á nýlegu varðskipi frá nágrannalöndum Íslands. Leggur Áslaug Arna til að nýtt skip Landhelgisgæslunnar fái nafnið Freyja. mbl.is/Eggert Jóhannesson

Ríkisstjórnin samþykkti á fundi sínum í dag tillögu Áslaugar Örnu Sigurbjörnsdóttur dómsmálaráðherra um kaup á skipi sem mun gegna hlutverki varðskips hjá Landhelgisgæslunni. Þetta kom fram á blaðamannafundi um borð í varðskipinu Þór í dag.

Fyrir skömmu kom í ljós að það væri með öllu óvíst hvort og hvenær varðskipið Týr gæti snúið aftur til starfa fyrir stofnunina í kjölfar alvarlegrar bilunar og skemmda á búnaði skipsins.

Frétt af mbl.is

Ekki öruggt að varðskipið Týr fari í rekstur á ný

Áslaug Arna segir í samtali við 200 mílur það ekki hafa verið forsvaranlegt að ráðstafa hundrað milljónum króna í viðgerð á eins gömlu skipi og varðskipið Týr er, en talið er að söluverð skipsins gæti numið 25 til 50 milljónum króna að loknum viðgerðum.

Landhelgisgæslan telur að hægt sé að kaupa nýleg og vel búin skip í góðu standi fyrir um 1-1,5 milljarða króna, að sögn Áslaugar Örnu. Bendir hún á að það gæti kostað 10 til 14 milljarða að láta smíða nýtt skip sambærilegt varðskipinu Þór.

Varðskipið Týr hefur verið í slipp frá janúar. mbl.is/sisi

Tiltölulega nýtt skip

„Týr er auðvitað orðið 46 ára gamalt og hefur þjónað hlutverki sínu með glæsibrag, en það er ekki forsvaranleg meðferð á opinberu fé að eyða mörg hundruð milljónum í viðgerð á svona gömlu skipi,“ segir Áslaug Arna. Hún segir í ljósi hagstæðra skilyrða á mörkuðum og til að leysa brýnan vanda Gæslunnar sé skynsamlegast að festa kaup á „tiltölulega nýju“ skipi.

„Við þurfum að tryggja að Gæslan geti sinnt sínu hlutverki sem grunnstoð í öryggismálum þjóðarinnar og höfum við verið stöðugt minnt á það undanfarið rúmt ár með ýmsum náttúruhamförum og áskorunum,“ útskýrir Áslaug Arna og bætir við að skipakaupin séu til þess fallin að styrkja Landhelgisgæsluna sem hafi sinnt hlutverki sínu einkar vel.

Frétt af mbl.is

Viðbragðsgeta Landhelgisgæslunnar takmörkuð

Freyja í rekstur næsta vetur

Gert er ráð fyrir að Landhelgisgæslan hafi tvö skip til umráða næsta vetur. Spurð hvort ákvörðun hafi verið tekin um hvaða skip verði fyrir valinu, svarar dómsmálaráðherra því neitandi.

„Það er verið að horfa til nýlegra skipa í nágrannalöndum okkar. Það er verið að kanna það og það er hægt að fá hagstæð skip sem henta vel og hafa sambærilega getu og Þór. Mikla dráttargetu og sambærilegan búnað. Þessi skip eru einnig umhverfisvænni en gamla skipið.“

Áslaug Arna Sigurbjörnsdóttir, dómsmálaráðherra, og Georg Lárusson, forstjóri Landhelgisgæslunnar, um borð í Þór í dag. mbl.is/Eggert Jóhannesson

Áslaug Arna kveðst hafa lagt fyrir Georg Lárusson, forstjóra Landhelgisgæslunnar, tillögu sína um nafn hins nýja varðskips. Leggur hún til að skipið beri nafnið Freyja í samræmi við nafnahefð skipa Landhelgisgæslunnar, en skipin sækja nöfn sín í norræna goðafræði.