Morgunblaðið | 9.3.2021 | 5:30

Ekki hægt að spila mikið betur úr loðnuvertíðinni

Huginn VE að veiðum. Ljósmynd/Vinnslustöðin

„Ég held ekki að það hafi verið hægt að spila mikið betur úr þessari loðnuvertíð heldur en raun ber vitni,“ segir Gunnþór Ingvason, framkvæmdastjóri Síldarvinnslunnar í Neskaupstað. Sumar útgerðir eru búnar að veiða loðnukvóta sinn, en aðrar ljúka væntanlega veiðum í vikunni hamli veður ekki. Gunnþór áætlar að útflutningsverðmæti loðnuafurða eftir vertíðina muni nema 22-25 milljörðum og eru útflutningsverðmæti 10 þúsund tonna, sem norsk skip lönduðu hérlendis inni í þeirri tölu.

Gunnþór segir að í síðustu viku hafi verið einmuna blíða á miðunum í Faxaflóa og Breiðafirði og skipunum gengið vel í hrognatúrunum. Heilt yfir hafi vertíðin gengið vel, samsetning og stærð loðnunnar verið hagstæð og öflugum skipum hafi gengið vel að veiða.

Um markaðinn segir Gunnþór að útlitið sé gott. Sérstaklega eigi þetta við um hrognamarkaðinn, enda sé magnið ekki mikið. Hátt verð fyrir heilfrysta loðnu standi þó aðeins í markaðnum.