Hafa lagt hald á skotvopnið
Setja bókamerki
Lögreglan á höfuðborgarsvæðinu telur sig hafa fundið skotvopnið sem notað var þegar Armando Bequiri var skotinn til bana fyrir utan heimili sitt í Rauðagerði laugardagskvöldið 13. febrúar.
Þetta segir Margeir Sveinsson yfirlögregluþjónn í samtali við mbl.is.
„Eftir bráðabirgðaniðurstöðu sérfræðinga má áætla að svo sé; að þetta sé vopnið sem var notað í þessu tilviki,“ segir Margeir. Hann vill ekkert tjá sig um hvenær lögreglan lagði hald á vopnið eða neitt nánar um það.
Bequiri hlaut níu skotáverka, meðal annars á lífsnauðsynleg líffæri, höfuð og bol, samkvæmt bráðabirgðaskýrslu réttarmeinafræðings vegna réttarkrufningar.
Lögreglan á höfuðborgarsvæðinu handtók fjóra og gerði húsleit á sex stöðum í umdæminu og utan þess í gærmorgun en aðgerðirnar tengjast rannsókninni á morðinu í Rauðagerði.
Margeir segir að fólkinu sem handtekið var í gær hafi verið sleppt að loknum skýrslutökum og að rannsókn málsins miði almennt vel.
Lögregla telur að manndrápið hafi verið framið í samverknaði nokkurra og jafnvel með hlutdeild annarra líkt og gögn og umfang málsins bera með sér. Margeir segir að lögreglan telji sig vera með þá aðila sem komi hvað mest að málinu; meðal annars þann sem framdi morðið.
Landsréttur staðfesti á dögunum úrskurð Héraðsdóms Reykjavíkur um að fella úr gildi skipun Steinbergs Finnbogasonar, verjanda eina Íslendingsins sem er sakborningur í málinu. Steinbergur segir að aðkoman hafi verið í fullu samræmi við starfsskyldur verjanda og sakar lögreglu um ljótan leik.
Margeir gefur lítið fyrir þau ummæli og segir að það hljóti að svara gagnrýninni þegar lögregla gerði kröfuna um að fella úr gildi skipun Steinbergs og héraðsdómur og Landsréttur staðfestu hana.
/frimg/1/46/76/1467631.jpg)
/frimg/1/37/35/1373596.jpg)
/frimg/1/21/17/1211789.jpg)
/frimg/1/29/73/1297312.jpg)
/frimg/1/7/5/1070585.jpg)
