Morgunblaðið | 26.3.2021 | 13:30

Erlendur höfundur heillar Íslendinga

Auglýsingin endar eftir 5 sekúndur.

Það var Elva Ósk Ólafsdóttir sem veitti verðlaun fyrir bestu glæpasöguna á Íslensku hljóðbókaverðlaununum, Storytel Awards, í ár. Bókin Illvirki hlaut verðlaunin í ár en það er Emelie Schepp sem skrifar bókina og Kristján Franklín Magnús les, þýðingu Kristjáns H. Kristjánssonar. Emelie Schepp sendi hlýjar kveðjur til íslenskra bókaunnenda.

Umsögn dómnefndar:

Hörkuspennandi glæpasaga sem rígheldur hlustanda allt frá fyrstu línu til þeirrar síðustu. Emilie Schepp er flink í að byggja upp spennu og óhugnað, flétta saman örlögum vel mótaðs persónugallerís og bregða birtu á ýmis áleitin samfélagsmálefni. Það sem lyftir Illvirki í verðlaunasæti er þó óumdeilanlega hinn framúrskarandi lestur Kristjáns Franklíns Magnúsar sem dómnefnd var sammála um að væri í algjörum sérflokki. Lestur Kristjáns Franklíns er leikrænn og lifandi, með litríkum blæbrigðum, en þó um leið nægilega hófstilltur til að hann þjóni ævinlega sögunni sjálfri og dragi ekki óþarfa athygli að hæfileikum lesara. Flutningur á heimsmælikvarða.

Dómnefnd Íslensku hljóðbókaverðlaunanna skipaði Sverrir Norland, Guðrún Sóley Gestsdóttir og Elva Ósk Ólafsdóttir. Sævar Helgi Bragason fór fyrir dómnefnd barna- og ungmennabóka.

Tilnefndar bækur í flokki glæpasagna

Hvítidauði
Höfundur: Ragnar Jónasson
Lesari: Íris Tanja Flygenring, Haraldur Ari Stefánsson

Stelpur sem ljúga
Höfundur: Eva Björg Ægisdóttir
Lesari: Þórdís Björk Þorfinnsdóttir

Fjötrar
Höfundur: Sólveig Pálsdóttir
Lesari: Sólveig Pálsdóttir

Fimmta barnið
Höfundur: Eyrún Ýr Tryggvadóttir
Lesari: María Lovísa Guðjónsdóttir

Illvirki
Höfundur: Emelie Schepp
Lesari: Kristján Franklín Magnús
Þýðandi: Kristján H. Kristjánsson