Morgunblaðið | 26.3.2021 | 12:47

Óstýriláta mamma mín og ég

Guðrún Sóley Gestsdóttir fékk það hlutverk að veita verðlaun fyrir besta óskáldaða efnið á Íslensku hljóðbókaverðlaununum, Storytel Awards. Bókin Óstýriláta mamma og ég mín hlaut hæstu einkunn dómnefndar og tók Sæunn Kjartansdóttir við verðlaununum, en hún bæði skrifar og les.

Umsögn dómnefndar:

Einstaklega hjartnæm og áhrifamikil saga sem hreyfir við hlustandanum og lifir með honum lengi á eftir. Höfundur dregur á ljóslifandi hátt upp myndir úr bæði fortíð og samtíð, fléttar tímasviðin saman af miklu öryggi og varpar ljósi á aðstæður margra íslenskra fjölskyldna nokkrar kynslóðir aftur í tímann. Verkið er skrifað af sterkri þörf höfundar til að reyna að skilja bæði eigið líf og annarra, einkum móður sinnar, og vinna úr flóknum tilfinningum. Það er viðeigandi að Sæunn Kjartansdóttir flytji hinn persónulega og einlæga texta sinn sjálf. Hún gerir það afburðavel, á látlausan en hlýjan hátt þegar upp er staðið, ekki síður en hin litríka, sterka og óstýriláta titilpersóna bókarinnar. Frumleg og eftirminnileg.

Dómnefnd Íslensku hljóðbókaverðlaunanna skipaði Sverrir Norland, Guðrún Sóley Gestsdóttir og Elva Ósk Ólafsdóttir. Sævar Helgi Bragason fór fyrir dómnefnd barna- og ungmennabóka.

Tilnefndar bækur í flokknum óskáldað efni

Björgvin Páll Gústavsson án filters
Höfundar: Sölvi Tryggvason, Björgvin Páll Gústavsson
Lesari: Rúnar Freyr Gíslason

Óstýriláta mamma mín og ég
Höfundur: Sæunn Kjartansdóttir
Lesari: Sæunn Kjartansdóttir

Ljósið í Djúpinu
Höfundur: Reynir Traustason
Lesari: Berglind Björk Jónasdóttir

Útkall - Tifandi tímasprengja
Höfundur: Óttar Sveinsson
Lesari: Óttar Sveinsson

Manneskjusaga
Höfundur: Steinunn Ásmundsdóttir
Lesari: Margrét Örnólfsdóttir