Morgunblaðið | 31.3.2021 | 10:40 | Uppfært 11:00

Ráðgjöf Hafró hækkar um 74% fyrir grásleppu

Lagt er til að 9.040 tonn af grásleppu verði veidd á fiskveiðiárinu. mbl.is/Hafþór Hreiðarsson

Heimilt verður að veiða 9.040 tonn af grásleppu á vertíð ársins ef farið verður að ráðgjöf Hafrannsóknastofnunar, sem birt var í dag. Um er að ræða myndarlega hækkun frá ráðgjöf stofnunarinnar fyrir vertíðina í fyrra þegar hún nam 5.200 tonnum og hækkar því ráðgjöfin um 74% milli ára.

Fram kemur á vef Hafrannsóknastofnunar að „ráðgjöfin byggir að mestu á stofnvístölu úr stofnmælingu botnfiska í mars 2021 en hún var sú hæsta frá upphafi mælinga 1985.“

Þá er bent á að stofnvísitölur hrognkelsa sveiflast milli ára og má það meðal annars að rekja til óvissu í mælingum. „Vegna þessa vegur stofnvísitala sama árs 70% á móti 30% vægi vísitölu fyrra árs við útreikning ráðlagðs hámarksafla. Hafrannsóknastofnun leggur jafnframt til að upphafsaflamark fiskveiðiárið 2021/2022 verði 3.174 tonn.“

Hafrannsóknastofnun ítrekar í ráðgjöf sinni að bæta þurfi skráningu meðafla og eftirlit með brottkasti við grásleppuveiðar.