Morgunblaðið | 2.4.2021 | 13:33 | Uppfært 13:58

Eldisstöð Arctic Fish stækkuð

Estrela Abelleira vinnur með hrogn frá Stofnfiski í seiðastöð Arctic Fish í Tálknafirði. Hún hreinsar egg og dauð seiði úr klakbökkunum. mbl.is/Helgi Bjarnason

Nú í sumar hefjast framkvæmdir við stækkun seiðaeldisstöðvar Arctic Fish í Tálknafirði sem jafnframt er stærsta bygging á Vestfjörðum. Reisa á 6.000 fermetra hús, en með því verður hægt að auka ársframleiðslu stöðvarinnar úr 500 í 1.000 tonn. Þá verður framleiðslugetan um 5 milljónir 200 gramma stórra seiða í stöðinni, en úr þeim fjölda ætti að vera hægt að ala á ári hverju um það bil 25.000 tonn af laxi í sláturstærð.

Kostar á þriðja milljarð kr.

Áætlaður kostnaður við stækkunina er vel á þriðja milljarð króna. Inni í þeirri tölu er meðal annars það sem kostar að koma upp 4 MW varaaflsstöð, sem þarf til að tryggja öryggi í stöðinni ef rafmagnslaust verður. Byggingartími er um tvö ár og munu um 40-50 manns koma að málinu á framkvæmdatíma.

Eldisstöðin í botni Tálknafjarðar sem nú stendur til að stækka. mbl.is

Í dag starfa um 55 manns hjá Arctic Fish. Fimmtán vinna í seiðaeldisstöðinni í Tálknafirði, um 30 manns eru við sjóeldið í Patreks-, Tálkna- og Dýrafirði og afgangurinn, um 10 manns, á skrifstofum félagins á Ísafirði og Tálknafirði. Stöðugt fjölgar í félaginu en félagið auglýsir nú eftir um 10 nýjum starfsmönnum sem hefja störf á næstu mánuðum. Nýverið lauk félagið við hlutafjárútboð og er nú skráð í kauphöllina í Ósló. Markaðsvirði félagsins er í dag um 30 milljarðar. Í dag eru um 8.000 tonn í sjó og gert er ráð fyrir að uppskera á þessu ári um 12.000 tonn sem er tæplega 40% aukning á milli ára.

Spennandi tímar fram undan

„Það eru spennandi tímar fram undan í fiskeldinu á Vestfjörðum og landinu öllu. Fyrirtækin eru farin að uppskera fisk allar vikur ársins og útflutningurinn er farinn að skipta íslenskt hagkerfi miklu máli,“ segir Stein Ove Tveiten forstjóri félagins í tilkynningu.

„Með eldi undanfarinna ára höfum við aflað okkur mikillar reynslu og starfsfólk okkar hefur náð góðum tökum á framleiðslunni. Við höfum því mikla trú á að vöxturinn geti haldið áfram og að framleiðsla innan Vestfjarða muni tvöfaldast frá því sem nú er á næstu árum. Stækkun okkar á seiðaeldisstöðinni í Tálknafirði er liður í því að mæta þeirri framleiðsluaukningu og gerir okkur kleift að setja út stærri seiði sem styttir þann tíma sem fiskurinn þarf að vera í sjónum,“ segir Tveiten enn fremur.