Morgunblaðið | 17.4.2021 | 18:01 | Uppfært 18:20

Siðanefnd féllst ekki á endurupptöku

Helgi Seljan fréttamaður. Skjáskot/RÚV

Siðanefnd RÚV hefur hafnað endurupptökubeiðni Helga Seljan, fréttamanns RÚV, í máli um brot Helga á siðareglum RÚV. Siðanefndin úrskurðaði í mars að Helgi hefði gerst brotlegur vegna ummæla sinna um Samherja. Úrskurðurinn hafði þó engin áhrif á störf hans innan RÚV.

Frétt af mbl.is

Helgi Seljan unir ekki úrskurði siðanefndar

Helgi fór fram á að málið yrði tekið upp aftur vegna meints vanhæfis Sigrúnar Stefánsdóttur, nefndarmanns í siðanefnd RÚV, en hún er jafnframt skólastjóri Vísindaskóla unga fólksins við Háskólann á Akureyri, sem er meðal annars styrktur af Samherja. Þá er hún einnig stjórnarmaður í N4 ehf. á Akureyri, sem er í óbeinni eigu Samherja, auk annarra, í gegnum fjárfestingarfélagið Vör og Síldarvinnsluna.

Í svari siðanefndar við endurupptökubeiðni Helga segir meðal annars:

„Hvað varðar hæfi eins nefndarmanna, Sigrúnar Stefánsdóttur, sem tilfnefnd var í siðanefnd RÚV af starfsmannafélagi RÚV eftir að kæra barst, þá kemur ekkert fram í bréfi þínu sem gefur til kynna að hún hafi ekki verið hæf í skilningi stjórnsýslulaga til að kveða upp úrskurðinn. Afmarkað verkefni Sigrúnar er varðar Vísindaskóla unga fólksins, sem er vikulangt námskeið fyrir börn á aldrinum 11-13 ára og er innan Háskólans á Akukreyri, lá fyrir og er greitt af Háskólanum á Akureyri, þó starfsemi skólans sé vissulega studd af 20-25 fyrirtækjum á Akureyri. Seta hennar í stjórn fjölmiðilsins N4, undanfarin sjö ár, sem sjálfstæður stjórnarmaður er öllum kunn. Hún er ekki eigandi fjölmiðilsins né á fjölmiðillinn sérstakra og verulegra hagsmuna að gæta í málinu. Fjölmiðillinn er jafnframt með skýrar reglur um ritstjórnarlegt sjálfstæði og stjórn hans kemur að engu leyti að ritstjórn og daglegum störfum. Því hefur ekkert komið fram sem raskar því mati að hún hafi verið hæf til að kveða upp úrskurð í málinu og ekkert komið fram sem dregur óhlutdrægni hennar með réttu í efa.“