Morgunblaðið | 27.4.2021 | 14:58

Ferð varðskipsins Þórs tók óvænta stefnu

Mælingar í Kolbeinsey. Ljósmynd/Landhelgisgæslan

Varðskipið Þór hefur verið á ferð fyrir norðan land meðal annars við mælingar á Kolbeinsey frá því í síðustu viku.

Skipið var í höfn á Þórshöfn á Langanesi eftir mælingar þegar stjórnstöð Landhelgisgæslunnar barst beiðni um aðstoð frá áhöfn skipsins í hádeginu á sunnudaginn vegna vélarvana línuskips um 40 kílómetra norðan við Langanes.

Frétt af mbl.is

Skipverjar veikir og fara í sóttkví

Frétt af mbl.is

Engin smit um borð

Ásgeir Erlendsson, upplýsingafulltrúi Landhelgisgæslunnar, segir að skipstjóri línuskipsins hafi haft aftur samband við Þór, áður en skipið var komið á svæðið til að vara við því að einhverjir í áhöfn sinni hefðu fundið fyrir flensueinkennum.

„Í kjölfarið gat stjórnstöð Landhelgisgæslunnar ræst út viðeigandi viðbragð, það er að segja látið sóttvarnaryfirvöld í héraði vita,“ segir Ásgeir.

Þór kom svo að skipinu um klukkan 18 á sunnudegi, þar sem línu var skotið á milli skipanna og skipið tekið í tog. „Það gekk allt saman vel,“ segir Ásgeir.

Skipið var komið um klukkan þrjú að nóttu í höfn á Þórshöfn þar sem áhöfnin fór í sóttkví. Sýnataka fór fram um klukkan átta í gærmorgun og kom niðurstaða úr henni síðdegis í gær. Enginn í áhöfninni reyndist smitaður.