Enginn sá hvað gerðist
Jóhann Ólafsson
Setja bókamerki
„Ég veit ekki hvað gerðist eða hvernig það gerðist því það sá það enginn,“ sagði Wieslaw Papacz, íbúi í húsinu við Bræðraborgarstíg sem fuðraði upp í eldsvoða 25. júní síðasta sumar.
Marek Moszczynski, pólskur karlmaður á sjötugsaldri, er ákærður fyrir brennu, manndráp og tilraun til manndráps með því að hafa kveikt í á þremur stöðum í húsinu við Bræðraborgarstíg. Þrír létust í brunanum. Marek neitar sök en hann er metinn ósakhæfur samkvæmt yfirmati geðlækna.
Hegðaði sér undarlega
Wieslaw, sem bar vitni í gegnum síma í aðalmeðferð í máli gegn Marek í dag vegna þess að hann er í Covid-einangrun, sagði að hegðun Mareks hefði verið skrítin áður en eldurinn kom upp. Hann hafi labbað um ör og verið öðruvísi en áður.
Hann hafi komið tvisvar inn til Wieslaw og nágrannakonu þeirra í húsinu, sagt eitthvað og farið út.
„Ég var að horfa á sjónvarpið og var á netinu og fór fyrir tilviljun fram og var í sjokki að sjá á hvaða stig eldurinn var kominn,“ sagði Wieslaw en hann fór fram úr herbergi sínu kannski klukkustund eftir að Marek kom þar í seinna skiptið.
Haldið sofandi í mánuð
Hann fór fljótt aftur inn í herbergi og vildi fara út um gluggann en glugginn var of lítill og Wieslaw sá reykinn koma undir hurðina inn í herbergi hans.
„Ég ákvað að fara í gegnum ganginn, setti sæng á mig og fór þá leið. Það var erfitt að anda en ég náði að komast út,“ sagði hann.
Hann var með brunasár á höndum, baki og víðar eftir að hafa komist út. Hann dvaldi í tvo mánuði á spítala og var þar af haldið sofandi í mánuð. Hann hefur þurft að gangast undir húðágræðslu vegna sára sinna.
Spurður almennt um líðan eftir brunann sagði Wieslaw að hann færi til lækna, sjúkraþjálfara og sálfræðinga.
/frimg/1/25/6/1250640.jpg)
/frimg/1/21/48/1214882.jpg)
