Morgunblaðið | 18.5.2021 | 9:01 | Uppfært 11:48

Fjórir grásleppubátar hafa rofið 100 tonna múrinn

Aþena ÞH er meðal þeirra fjögurra báta sem landað hafa yfir 100 tonnum af grásleppu. mbl.is/Hafþór Hreiðarsson

Fjórir grásleppubátar hafa rofið 100 tonna múrinn á vertíðinni, en afli hefur í heild verið einstaklega góður. Sigurey ST frá Drangsnesi er aflahæst með 110,3 tonn, Hlökk ST með 107,2 tonn, Aþena ÞH með 103,4 tonn og Rán SH hefur landað 100 tonnum. Meðalafli á bát er sá hæsti í sögu grásleppuveiða og stendur í 39 tonnum, en í fyrra var meðalaflinn á bát 26 tonn á allri vertíðinni.

159 hafa fengið leyfi til veiða og hafa 152 landað afla. Gera má ráð fyrir að þeim fjölgi lítillega þegar veiðar mega hefjast í innanverðum Breiðafirði. Um nokkra fækkun er að ræða frá síðasta ári þegar alls landaði 201 bátur afla og árið 2019 voru bátarnir 250. Líklegasta skýringin á mikilli fækkun báta er verðlækkun, en 2019 fengust um 330 krónur fyrir kílóið, 230 krónur í fyrra og algengt verð í ár var 130 krónur á kíló af óskorinni grásleppu.

Frétt af mbl.is

Tugir gáma af hveljum óseldir

Heimilt var að hefja grásleppuveiðar 23. mars og eftir breytingar á reglugerð voru leyfðir 35 samfelldir veiðidagar. Flestir hafa lokið vertíð nema á innra svæði Breiðafjarðar, þar sem veiðar mega hefjast á fimmtudag. Ráðgjöf Hafrannsóknastofnunar var upp á 9.040 tonn, þar af 22% á Breiðafirði. Afli er nú kominn í tæplega sex þúsund tonn. Í fyrra veiddust alls tæp 5.300 tonn.

Langflestir bátar, eða 61, hafa róið frá svæði E á Norðausturlandi, en þaðan fóru 78 bátar á grásleppu í fyrra. 28 bátar hafa róið á svæði D frá Ströndum og öðrum höfnum við Húnaflóa eða 28 en voru 34 í fyrra.