Morgunblaðið | 2.6.2021 | 13:04

Segja mikilvægt að Samherji axli ábyrgð

Samtök fyrirtækja í sjávarútvegi segir stefnu um samfélagslega ábyrgð vera til þess fallna að beina Samherja inn á rétta braut. mbl.is

„Við[ur]kennt var að vikið var af braut,“ segir í yfirlýsingu sem Samtök fyrirtæki í sjávarútvegi (SFS) hafa birt á vef sínum í tengslum við umfjöllun fjölmiðla um mál Samherja. Telja samtökin „mikilvægt að fyrirtækið axli ábyrgð á eigin ákvörðunum og athöfnum, stuðli að gagnsæjum starfsháttum og góðum samskiptum.“

Tilefni yfirlýsingarinnar er afsökunarbeiðni sem birt var á vef Samherja 30. maí.

Frétt af mbl.is

Samherji biðst afsökunar

Þá segir að afstaða samtakanna vegna mála fyrritækisins hafi verið „afdráttarlaus“ og er vísað til fyrri yfirlýsinga frá 14. og 19. nóvember 2019. „SFS gera þá kröfu að félagsmenn fylgi lögum, bæði hér heima og erlendis, og viðhafi góða viðskipta- og stjórnarhætti.“

Þá er bent á að fyrirtæki sem eiga aðild að samtökunum hafi mótað stefnu um samfélagsábyrgð sem grundvallast á heimsmarkmiðum Sameinuðu þjóðanna um sjálfbæra þróun. „Einstakar ákvarðanir fyrirtækja geta gengið gegn því sem kveðið er á um í stefnu um samfélagsábyrgð. Það er ekki ætlunin að SFS refsi hlutaðeigandi fyrirtæki. Þvert á móti. Í slíkum aðstæðum er stefnan einmitt mjög mikilvæg – hún er leiðarljós fyrirtækja aftur inn á rétta braut,“ segir í yfirlýsingunni.