Morgunblaðið | 8.6.2021 | 11:42

Hjörvar kveðst stoltur af Berki

Nýi Börkur þykir hinn glæsilegasti og eru heimamenn stoltir af skiðinu sem mun hefja veiðar í þessari viku. Ljósmynd/Kristín Hávarðsdóttir

„Þetta gekk bara óskaplega vel,“ segir Hjörvar Hjálmarsson, skipstjóri á nýja Berki, um siglinguna heim sem tók fimm daga. Siglt var vestur í gegnum Skagerrak frá Skagen í Danmörku og vestur með Noregi áður en stefnan var tekin til vesturs í átt að Færeyjum og þaðan til Íslands. „Við vorum bara í skoðunarferð. Skoðuðum Færeyjar vel og vinkuðum vinum okkar þar. Mjög þægilegt ferðalag á mjög góðu og glæsilegu skipi.“

Frétt af mbl.is

Tekið vel á móti Berki í Neskaupstað

Hjörvar er hæstánægður með hvernig sé að sigla skipinu. „Það er mjög ljúft. Það er hljóðlátt og sparneytið greinilega, það fer ekki mikið af olíu miðað við fyrri skip. Þetta lítur allt mjög vel út og næsta mál á dagskrá er að prófa hann á veiðum.“

Vandað skip í alla staði

Spurður hvernig sé að setjast í skipstjórnarstólinn á glænýju skipi svarar skipstjórinn: „Það er bara góð tilfinning að vera treyst fyrir því að taka við nýju skipi og maður er stoltur af því að fá svona tækifæri, það er ekki sjálfgefið á ferlinum að komast á nýsmíði. Þær hafa nú ekki verið allt of margar hér á Íslandi en fer fjölgandi sem betur fer.“

Hjörvar Hjálmarsson skipstjóri á nýjum Berki. Ljósmynd/Aðsend

Þá segir Hjörvar margt við nýja Börk minna á geimskip. „Það er allt hlaðið af búnaði og svolítið nýr heimur. Þótt það sé ekki nema níu ára, skipið sem við vorum á, þá er þetta gríðarleg breyting í tækni frá því að hann var kláraður. Þetta er allt eins tæknilegt og hægt er og mjög flott skipasmíðastöð sem þetta er smíðað hjá, það er alveg ótrúlega vandað skipið að sjá í alla staði.“ Bætir hann við að áhöfnin sé ánægð með aðbúnað og vinnuaðstöðu um borð. „Þeir eru bara í sjöunda himni með þetta. Allt eins glæsilegt og hægt er.“

Er maður stoltur af því að vera á svona skipi?

„Já, það er nú eiginlega ekki hægt annað. Komum hérna í hádeginu [á fimmtudag] í fylgd með Beiti í stórglæsilegu veðri, bæjarbúar á bryggjunni að mynda og við tókum nokkra hringi fyrir framan þá. Þetta var mjög flott stund.“