Morgunblaðið | 21.6.2021 | 19:42 | Uppfært 22.6.2021 7:03

Farsæll, Sigurborg og Drangey komin í sumarfrí

Grundarfjarðarskipin Farsæll SH-30 og Sigurborg SH-12 eru komin í sumarstopp. mbl.is/Alfons Finnsson

Þrjú skip Fisk Seafood komu til hafnar í síðasta sinn fyrir sumarstopp í dag, að því er fram kemur á vef fyrirtækisins.

Farsæll SH-30 og Sigurborg SH-12 komu til löndunar í Grundarfirði. Nam heildarafli Farsæls 66 tonnum, þar af 37 tonn af ýsu. Þá nam heildarafli Sigurborgar 60 tonnum sem skiptist í ýsu, þorsk, karfa og ufsa.

Drangey SK-2 kom til hafnar á Sauðárkróki og var landað rúmum 200 tonnum úr skipinu. Þar af voru 80 tonn af ýsu og 65 tonn af þorski. Aflinn fékkst á Deildagrunni og Halanum.