Morgunblaðið | 1.7.2021 | 19:22 | Uppfært 20:50

Gísli, Baldur og Quentin aflahæstir

Hugrún DA, áður Rán SH, var aflahæsti báturinn á grásleppuvertíðinni. Ljósmynd/Arnbjörn Eiríksson

Aflahæsti báturinn á grásleppuvertíðinni hingað til er Hugrún DA-1 með 115 tonn. Báturinn er gerður út frá Skarðsstöð á Skarðsströnd í Dölum og segir í umfjöllun Skessuhorns að það séu feðgarnir Gísli Baldursson og Baldur Þórir Gíslason sem ásamt Quentin Monner skipa áhöfn Hugrúnar.

Fátt bendir til þess að nokkur annar bátur muni ná jafn miklum afla áður en tímabilinu lýkur endanlega en vertíðin hefur verið „fengsæl“ að því er segir á vef Landssambands smábátaeigenda.

Fram kemur að alls hafi 172 bátar stundað grásleppuveiðar á vertíðinni og nemur afli þeirra 7.349 tonnum þegar tveir bátar eru enn að veiðum. Á vertíðinni hefur því afli hvers báts að meðaltali verið 43 tonn, sem sagður er sá mesti í sögu grásleppuveiða og samsvarar þetta yfir 80 tunnum af hrognum.

Fúsi var með mesta afla á hverja löndun að meðaltali.

Þá hafa landanir á vertíðinni verið 2.742 sem gefur 2,7 tonna meðaltal. Fúsi SH var með hæsta meðaltalið 7,3 tonn eða 51,4 tonn í sjö róðrum.

Fimm bátar náðu yfir 100 tonnum og voru það Hugrún DA með 115,1 tonn, næst Sigurey ST með 110,3 tonn, síðan Hlökk ST með 107,2 tonn, svo Aþena ÞH með 103,4 tonn og er fimmti báturinn Rán SH með 100 tonn.