Morgunblaðið | 14.8.2021 | 14:54 | Uppfært 15:12

Varpa ljósi á vistkerfi Grænlandssunds

Griparmur á Ægi 6000 með „sveppakóral“. Ljósmynd/Hafrannsóknastofnun

Vísindamenn Hafrannsóknastofnunar ásamt kollegum sínum frá Greenland Natural Resources (GINR) og Zoological Society í London (ZSL) fóru á norska rannsóknaskipinu G. O. Sars í leiðangur 1. til 10. ágúst til að rannsaka vistkerfi hafsbotnsins í Grænlandssundi.

Þar mætir hlýr sjór frá Norður Atlantshafi köldum sjó frá Norðurslóðum og segir í færslu á vef Hafrannsóknastofnunar að þar sé „mikill breytileiki í botnhita, straumhraða og botngerð sem hefur áhrif á samsetningu lífríkis á botninum“.

Á kortinu sjást þeir 28 staðir er kafað var á. Kort/Hafrannsóknastofnun

Ægir 6000 á leið á hafsbotn. Ljósmynd/Hafrannsóknastofnun

Ómannaði kafbáturinn Ægir 6000 var notaður í leiðangrinum, en hann er búinn hágæðamyndavélum sem tóku ljósmyndir og tóku upp myndbönd. Þá er á Ægi sérstakur griparmur sem nýttur var til að safna lífverum til frekari greininga.

„Kafað var á 28 stöðvum, bæði innan íslenskrar og grænlenskrar lögsögu. Mikill fjölbreytileiki svampa, kórala og annarra botndýra sást. Í flestum tilfellum er þetta fyrsta myndefni sem safnað hefur verið neðansjávar af þessum slóðum,“ segir í færslunni, en tveimur köfunum var streymt beint á samfélagsmiðlum.

Fjöldi vísindamanna tók þátt í leiðangri til að auka þekkingu á vistkerfinu á botni Grænlandssunds. Ljósmynd/Hafrannsóknastofnun

Svampur án nafns. Ljósmynd/Hafrannsóknastofnun

Fram fóru mælingar á straumum, seltu, hita og kolefni auk þess sem fjölgeislamælingar á botninum voru gerðar á þeim stöðum þar sem slík gögn voru ekki fyrirliggjandi. „Þær upplýsingar sem fást úr leiðangrinum munu varpa ljósi á auka skilning okkar á vistkerfi Grænlandssunds og eru góð undirstaða fyrir frekari rannsóknir á mögulegum breytingum og einnig til að meta verndargildi svæðisins.“

Leiðangurinn var hluti af verkefninu BENCHMARK og var styrktur af Eurofleets+ Evrópusjóðnum ásamt framlagi þeirra stofnana sem tóku þátt. Julian Burgos hjá Hafrannsóknastofnun stjórnaði leiðangrinum.