Morgunblaðið | 19.8.2021 | 14:29 | Uppfært 14:44

Brim selur Höfrung III og kaupir Iivid

Höfrungur III AK-250. Ljósmynd/Brim

Brim, stærsta sjávarútvegsfyrirtæki Íslands, hefur selt frystitogarann Höfrung III AK-250 til Rússlands og verður skipið afhent nýjum eigendum í september.

Þetta kemur fram í tilkynningu til Kauphallarinnar þar sem félagið er skráð.

Þar segir að kaupandi skipsins sé Andeg Fishing Collective í Murmansk og er söluverð 5 milljónir bandaríkjadala.

Höfrungur var smíðaður í Noregi árið 1988, 56 metra langur, 1.521 brúttótonn.

Félagið hefur svo keypt skipið Iivid af Arctic Prime Fisheries á Grænlandi fyrir 58 milljónir danskra króna.

Smíðaður árið 1999

Iivid var smíðaður í Noregi árið 1999 og er 67 metra langur og 1.969 brúttótonn. Áætlað er að Iivid muni koma í flota félagsins í lok ágústmánaðar og mun fá nafnið Svanur RE-45.

Þá var nýlega greint frá því að Útgerðarfélag Reykjavíkur hf. (ÚR) hafi fest kaup á frystitogaranum Tasermiut sem var áður í eigu Arctic Prime Fisheries á Grænlandi, sem hlotið hefur nýja nafnið Sólborg RE-27.

Arctic Prime fisheries er að hluta til í eigu Brims og ÚR sem eiga hvor sinn 16,5 prósent hlutinn í grænlensku útgerðinni.

Guðmundur Kristjánsson, forstjóri Brim hf. er einnig í stjórn Arctic Prime Fisheries.