Morgunblaðið | 1.9.2021 | 22:55

Pétur Jakob til Héðins

Pétur Jakob Pétursson nýr markaðs- og sölustjóri HPP, próteinverksmiðju Héðins. Ljósmynd/Aðsend

Pétur Jakob Pétursson hefur verið ráðinn markaðs- og sölustjóri hjá HPP, hátæknipróteinverksmiðju sem hönnuð er og smíðuð hjá Héðni.

Verksmiðjan er til í útfærslu fyrir vinnslu á landi og á sjó en þau skip sem hafa hana um borð geta nýtt aflann hundrað prósent, með því að bræða það sem til fellur í lýsi og mjöl.

Þetta kemur fram í tilkynningu frá Héðni.

Þar segir einnig að Pétur Jakob sé sjávarútvegsfræðingur frá Háskólanum á Akureyri og Tromsö. Pétur hefur komið víða við á sviði sjávarútvegs og starfaði síðast sem sölustjóri hjá Skaganum 3X.

Þá hefur hann starfað sem innkaupastjóri hjá DeutschSee í Þýskalandi og við framleiðslu- og gæðastýringu hjá Samherja.

Verksmiðjur í togurum og á landi

„Héðinn hefur fjárfest rúmum milljarði króna í þróun HPP og umsvif próteinverksmiðjunnar aukist ár frá ári,“ segir í tilkynningunni.

Þar segir sömuleiðis að HPP sé nú að finna um borð í frystitogurum Ramma, Brims og Samherja og dótturfélaga þeirra, og í skipum erlendra útgerða.

„Smíði er hafin á nýrri 380 tonna HPP verksmiðju fyrir Síldarvinnsluna í Neskaupsstað og stutt er síðan Gröntvedt Nutri í Noregi tók 350 tonna HPP í notkun til að fá hundrað prósent nýtingu hráefnis við vinnslu á makríl og síld.“

Haft er eftir Pétri Jakobi í tilkynningu að hann hlakki til að taka til starfa hjá Héðni sem bráðlega heldur upp á 100 ára afmæli.

“Sjávarútvegurinn leggur áherslu á að skapa sem mest verðmæti og með HPP geta fyrirtækin náð 100% nýtingu aflans og hámarkað virði hans. Framsækin fyrirtæki í sjávarútvegi hafa áttað sig á þeim auknu verðmætum sem HPP skapar. Það eru ekki margir sem geta státað af því að gera heiminn örlítið grænni en þeir komu að honum, en sú er raunin hvað HPP varðar,“ er haft eftir Pétri Jakobi.