Morgunblaðið | 7.9.2021 | 10:51

Landtenging jákvætt skref í orkuskiptum

Stjórnbúðaður fyrir landtengingu við Norðfrjarðarhöfn. Ljósmynd/Síldarvinnslan

Á síðustu dögum hafa uppsjávarskip verið tengd við rafmagn í landi við komuna til Neskaupstaðar, fyrst Vilhelm Þorsteinsson EA í lok síðustu viku og síðan Börkur NK í gær. Unnið er að því að setja búnað til landtengingar í Beiti NK. Gunnþór Ingvason, forstjóri Síldarvinnslunnar, segir um tímamót að ræða og jákvætt skref í orkuskiptum í sjávarútvegi.

Íslensk fyrirtæki rói öll í sömu átt hvað varði orkuskipti og í sjávarútvegi sé fyrst að nefna þegar ráðist var í rafvæðingu orkufrekra fiskimjölsverksmiðja. Fleiri möguleikar séu til orkusparnaðar með orkuskiptum.

Krani til að koma landtengingarköplum um borð í skip. Ljósmynd/Síldarvinnslan

Aflmikil tenging

Í landtengingunni felst að skipið fær raforku úr landi til að kæla aflann, dæla honum á land og sinna annarri raforkunotkun um borð meðan á löndun stendur í stað þess að framleiða orku með vélbúnaði sem nýtir olíu sem orkugjafa.

„Hér er um að ræða mikilvægt umhverfismál og ótvírætt framfaraskref. Samkvæmt bestu heimildum er þetta í fyrsta sinn sem fiskiskip er landtengt með svo aflmikilli tengingu en tengingin flytur 500 kW,“ segir á heimasíðu Síldarvinnslunnar.

Þar kemur fram að með landtengingu er notaður umhverfisvænn, innlendur orkugjafi á meðan löndun úr skipi fer fram í stað innfluttrar olíu og að notkun á umhverfisvænum orkugjöfum styrkir ímynd íslensks sjávarútvegs. Þegar öll uppsjávarskip sem landa í Neskaupstað verða komin með tilheyrandi búnað megi gera ráð fyrir að olíunotkun minnki um 300 þúsund lítra á ári.

Nokkurra ára verkefni

Hafin var vinna við þessa landtengingu við uppsjávarskipin árið 2013. Kostnaður við verkefnið mun vera á annað hundrað milljónir króna. Verkefnið er unnið í samvinnu Síldarvinnslunnar og verkfræðistofunnar EFLU, en búnaðurinn er framleiddur af ABB sem Johan Rönning hefur umboð fyrir.

Frá vinstri: Jón Atli Bjarnason frá Eflu, Daði Benediktsson frá Eflu, Jóhann Pétur Gíslason vélstjóri á Berki og Þórarinn Ómarsson rafvirki hjá Síldarvinnslunni. Ljósmynd/Síldarvinnslan