Morgunblaðið | 11.9.2021 | 10:27

Sömu fíflin alls staðar

Árdís Inga Höskuldsdóttir, verkstjóri á markríl- og síldarvertíð hjá Ísfélagi Vestmannaeyja á Þórshöfn, segist hafa farið á sína fyrstu vertíð þegar hún var sextán ára.

Árdís Inga Höskuldsdóttir, verkstjóri á markríl- og síldarvertíð hjá Ísfélagi Vestmannaeyja á Þórshöfn, er nýútskrifaður sjávarútvegsfræðingur. Árdís hefur starfað í fiskvinnslu af ýmsum toga í mörg ár en ætlaði aldrei að þora að sækja sér menntun í faginu. Árdís útskrifaðist í vor með BS-gráðu með fyrstu einkunn.

„Það er enginn vinnslustjóri eins og staðan er núna svo við verkstjórarnir skiptum með okkur verkefnum,“ segir Árdís Inga Höskuldsdóttir, verkstjóri og nýútskrifaður sjávarútvegsfræðingur hjá Ísfélagi Vestmannaeyja á Þórshöfn um skipulag vertíðarinnar þar í bæ í ár.

Makríl- og síldarvertíð, sem yfirleitt rennur í eitt fyrir norðan, er í algleymingi og er langt frá því að vera fyrsta vertíð Árdísar, sem hélt á sína fyrstu vertíð árið 2001.

„Ég fór á mína fyrstu vertíð árið 2001 þegar ég var sextán ára, á loðnu,“ segir Árdís frá.

Ellefu vertíðum síðar

Vertíðir á Þórshöfn urðu síðan árviss viðburður hjá Árdísi þegar markríll fór að veiðast í nokkru magni við Íslandsmið árið 2009 og hefur Árdís tekið þátt í þeim allar götur síðan ef undanþegið er eitt ár.

Innan skamms var Árdís orðin verkstjóri á vertíðum og flutti hún svo til Þórshafnar alfarið árið 2014 og varð verkstjóri allan ársins hring í fiskvinnslu Ísfélagsins.

Lesblind og með athyglisbrest

„Ég ákvað síðan að láta slag standa og reyna við sjávarútvegsfræði. Ég er lesblind og með mikinn athyglisbrest og kláraði aldrei neinn framhaldsskóla en komst inn í Háskólann á Akureyri á meðmælum,“ segir Árdís sem fékk undandþágu til að skrá sig í nám í háskólanum.

„Ég hafði lokið ýmsum námskeiðum og var búin að láta meta mig upp í fisktækni en ég hafði engann akademískan grunn, þú getur rétt ímyndað þér hvað það var erfitt að fara í þetta nám fyrir mig.“

Af hverju ákvaðstu að skrá þig í þetta nám?

„Bara mjög mikill áhugi á sjávarútvegi, mikið að gerast í iðnaðinum og ýmsir starfsmöguleikar á ýmsum sviðum.“

Árdís segir að mest hafi komið sér á óvart við að fara í háskóla að þar eru sömu fíflin að finna eins og annars staðar.

Raungreinar áskorun

„Ég hélt að allir væru svo mikið klárari en ég sem færu í háskóla en svo kem ég þarna og það eru allir spaðgrillaðir,“ segir Árdís og hlær.

Hún segir að henni hafi mest vaxið í augum að takast á við raungreinarnar.

Í sjávarútvegsfræði þarf að standa skil á stærðfræði, efnafræði, eðlisfræði, líffræði, örverufræði, matvælafræði og nokkrum hagfræðikúrsum.

Þér tekst að komast í gegnum allar þessar raungreinar með lítinn grunn. Hvernig tókst þér þetta?

„Þetta hafðist með ótrúlega góðum hópi. Við vorum náinn og þéttur hópur að læra saman, þetta hefði ekki tekist án samnemenda minna. Það eru einnig góðir kennarar við skólann.“

Skemmst er frá því að segja að Árdís útskrifaðist með ágætiseinkunn í vor.