Morgunblaðið | 15.9.2021 | 21:02

Stærsti nemendahópur sjávarútvegsskólans til þessa

Nemendur í Sjávarútvegsskóla Gró hafa aldrei verið fleiri. Ljósmynd/Hafrannsóknastofnun

Sjávarútvegsskóli Gró hefur tekið til starfa á ný eftir árs hlé sökum heimsfaraldurs og koma nemendur víðsvegar að, frá 17 ríkjum. Um er að ræða stærsta hóp sem komið hefur hingað til lands á vegum skólans, að því er fram kemur í færslu á vef Hafrannsóknastofnunar sem hýsir skólann.

Á þriðjudag var farið í vettvangsferð í tilraunaeldisstöðina að Stað við Grindavík þar sem starfsmenn stöðvarinnar tóku á móti nemendum og kynntu starfsemina. „Stöðin vakti mikinn áhuga og útskýrðu starfsmennirnir hin ýmsu verkefni sem þar eru unnin. Fólkið var mjög áhugasamt og spurði mikið út í starfsemina,“ segir í færslunni.

Haraldur Einarsson fræðir um veiðarfæri. Ljósmynd/Hafrannsóknastofnun

Þá var Haraldur Einarsson, veiðarfærasérfræðingur, með í vettvangsferðinni og fræddi nemendur um ólík veiðarfæri og virkni þeirra við netaverkstæðið í Grindavík. Auk þess skoðuðu nemendur Saltfisksetrið í Grindavík var einnig skoðað og var að lokum gengið að hrauninu í Nátthaga.

Skólinn, sem starfræktur er undir merkjum UNESCO, tók til starfa 1. janúar 2020 byggir á grunni Sjávarútvegsskóla Háskóla Sameinuðu þjóðanna sem var stofnaður árið 1998 með þríhliða samkomulagi milli Háskóla Sameinuðu þjóðanna, utanríkisráðuneytisins og Hafrannsóknastofnunar.