Morgunblaðið | 21.9.2021 | 15:28

„Það má segja að makrílvertíðin hafi gengið vel“

Runólfur Runólfsson skipstjóri Ljósmynd/Síldarvinnslan/Smári Geirsson

Makrílvertíðinni er lokið að sinni hjá langflestum og kom Bjarni Ólafsson AK með það sem verður líklega síðasti makrílfarmur skipsins á vertíðinni til Neskaupstaðar á laugardag. Nam afli skipsins 260 tonnum og var aflinn úr íslenskum sjó, um 160 mílur norðaustur af Dalatanga

„Við fengum þennan afla á þremur dögum. Það var tekið eitt hol á dag, kastað um hádegisbil og híft um kvöldmatarleytið. Við fengum 120 tonn í einu holi en síðan voru 65 og 75 tonn í hinum tveimur. Það var ekki mikið af makríl þarna á ferðinni og fiskurinn var afar dreifður,“ segir Runólfur Runólfsson, skipstjóri á Bjarna Ólafssyni, í færslu á vef Síldarvinnslunnar.

Bjarni Ólafsson AK að veiðum við suðurströndina. Ljósmynd/Daði Ólafsson

„Það má segja að makrílvertíðin hafi gengið vel en áberandi var að fiskurinn var miklu dreifðari en undanfarin ár. Hægt er að þakka samstarfi skipanna, sem lönduðu hjá Síldarvinnslunni, fyrir árangurinn á vertíðinni. Samstarfið var lykillinn að góðum árangri en það felur í sér að afla allra skipanna var dælt um borð í eitt þeirra hverju sinni,“ segir Runólfur.

Á næstunni mun Bjarni Ólafsson halda til síldarveiða.