Morgunblaðið | 22.9.2021 | 17:23

Þór kallaður út vegna flutningaskips

Varðskipið Þór á siglingu. Mynd úr safni. mbl.is/Árni Sæberg

Varðskipið Þór var kallað út í nótt eftir að talsverð slagsíða hafði komið á erlent flutningaskip sem statt var suður af landinu.

Farmur skipsins hafði færst til í vonskuveðri þegar skipið fór fyrir Reykjanes, að því er segir í tilkynningu frá Landhelgisgæslunni.

Segir í henni að áhöfnin hafi freistað þess að fara inn til Vestmannaeyja áður en aðstæður versnuðu.

„Hallinn jókst þegar leið á og áttu skipstjórnarmennirnir í erfiðleikum með að halda stefnu inn til Vestmannaeyja. Varðskipið Þór og hafnsögubáturinn Lóðsinn fylgdu skipinu heilu og höldnu inn til hafnar. Þegar þangað var komið var slagsíða skipsins orðin 10-15 gráður.“