Morgunblaðið | 29.9.2021 | 18:11 | Uppfært 4.10.2021 9:50

Aukið eftirlit með hjálp gervigreindar

Verkefnið sem LHG mun taka þátt í á að auka sjálfvirkni við eftirlit, löggæslu, leit og björgun á norðurslóðum með gagnasöfnun og gervigreind. mbl.is/Árni Sæberg

Landhelgisgæslan tekur þátt í alþjóðlega nýsköpunarverkefninu AI-ARC, sem á að auka sjálfvirkni við eftirlit, löggæslu, leit og björgun á norðurslóðum með gagnasöfnun og gervigreind.

Þetta kemur fram á vef LHG.

„Ætlunin er að útbúa nýstárlegt, öflugt, skilvirkt og notendavænt kerfi sem aflar gagna um skipaumferð og sjótengda starfsemi. Því er ætlað að auðvelda greiningu á hvers kyns frávikum, auðvelda áhættugreiningu og leiða til samþættra upplýsinga um skipaumferð,“ segir í tilkynningunni.

Mun markmið verkefnisins meðal annars felast í því að búa til verkfæri til löggæslu- og öryggisstofnana sem auðvelda ákvarðanatöku og auka öryggi sjófarenda. Er LHG þá ætlað að greina siglingar og sjótengda starfsemi á norðurslóðum og leggja mat á kerfið sem felst í verkefninu.

Verkefnið er fjármagnað af Horizon2020, nýsköpunarsjóði Evrópusambandsins, og mun standa í hálft þriðja ár.