Morgunblaðið | 5.10.2021 | 14:35

Nýtt tæknistig létti á krefjandi vinnu í Hnífsdal

Þórarinn Kristjánsson, sölustjóri hjá Marel, og Einar Valur Kristjánsson, framkvæmdastjóri HG, við undirritun samningsins. Ljósmynd/Marel

Hraðfrystihúsið Gunnvör hf. (HG) í Hnífsdal hefur undirritað samning við Marel um kaup á FleXicut kerfi sem verður hluti af vinnslulínu fyrirtækisins fyrir bolfisk. Fjárfestingunni er ætlað að skila aukinni sjálfvirkni, auknum gæðum og aukin afköst, að því er fram kemur í fréttatilkynningu.

„Við hlökkum til að taka okkar landvinnslu upp á nýtt tæknistig með þeim áskorunum sem því fylgja. Það mun styrkja okkur í samkeppninni á kröfuhörðustu mörkuðum heims, létta á krefjandi vinnu starfsfólks og bæta afkomu fyrirtækisins til lengri tíma litið,“ segir Einar Valur Kristjánsson, framkvæmdastjóri HG, í tilkynningunni.

160 starfa hjá Hraðfrystihúsinu Gunnvöru. mbl.is/Halldór Sveinbjörnsson

Kerfið sem sett verður upp í vinnslu HG samanstendur af FleXitrim snyrtilínu, FleXicut skurðarvél og FleXisort afurðadreifingarkerfi.

Nýja snyrtilíninan er með innbyggða gæðaskoðun og er sögð jafna flæði forsnyrtra flaka inn í FleXicut kerfið, en þar er beingarður greindur og skorin burt ásamt þunnildi og sporði með mikilli nákvæmni. Tækið sker svo flökin niður í bita samkvæmt forskrift viðskiptavinar. Flokkunarkerfið FleXisort tekur svo við en það er hannað til þess að taka við afurðum og dreifa á mismunandi afurðarlínur.

Markmið HG með vélunum er að ná fram hámarks nýtingu á afurðinni og þannig auka þau verðmæti sem nást úr hverjum fiski.

„Við bjóðum HG í Hnífsdal hjartanlega velkomið í Flexicut fjölskylduna. Það sem einkennir fiskvinnsluna hjá HG er fjölbreytileiki þ.e. verið er að vinna afurðir með og án roðs í ferskar, frosnar og léttsaltaðar. Öllu þessu erum við að ná að sinna með Flexicut kerfinu þar sem hver afurð á sitt heimili,” segir Þórarinn Kristjánsson, sölustjóri hjá Marel.

Hraðfrystihúsið hf. var stofnað fyrir rúmum áttatíu árum og byggir landvinnsla HG á vinnslu úr fersku hráefni, aðallega þorski. Hjá HG starfa um 160 manns.