Morgunblaðið | 5.10.2021 | 14:26 | Uppfært 14:48

Stór fleki við Búðará kominn á hreyfingu

Stór fleki í jaðri skriðusársins við Búðará er kominn á hreyfingu, samkvæmt upplýsingum frá Veðurstofu Íslands. Ljósmynd/Björgunarsveitin Ísólfur

Stóri fleki í jaðri skriðusársins við Búðará hefur verið á hreyfingu frá því á laugardag. Frá þessu er greint í færslu á facebooksíðu Veðurstofu Íslands í dag. Um er að ræða fleka sem varð eftir þegar stóra skriðan féll á þessu svæði í desember síðastliðnum, að sögn Estherar Hlíðar Jensen, ofanflóðasérfæðings hjá Veðurstofu Íslands.

Frétt af mbl.is

Lýsa upp Búðarána til að fylgjast með svæðinu

„Það eru tveir speglar staðsettir á þessum fleka og við höfum verið að mæla staðsetningu þeirra á hálftíma fresti. Út frá þessum mælingum höfum við séð hreyfingu á speglunum. Hreyfingin er lítil en nógu mikil til að mælitækin okkar nemi hana.“

Ríkislögreglustjóri lýsti í gær, í samráði við lögreglustjórann á Austurlandi, yfir hættustigi almannavarna á Seyðisfirði vegna hættu á skriðuföllum og var fjöldi húsa á svæðinu rýmdur í kjölfarið.

Litlar líkur eru þó á að flekinn fari af stað í dag, segir Esther innt eftir því. Vatnsstaða í borholum sem einnig eru í hlíðinni hafi farið lækkandi frá því í gær sem dragi úr líkunum á að flekinn fari af stað.

„Hins vegar er von á mikilli úrkomu í vikunni og þá þurfum við að rýna mjög vel í stöðuna,“ segir hún að endingu.