Morgunblaðið | 11.10.2021 | 21:08

Rýmingu aflétt að hluta

Allar líkur eru á að varnargarðar og safnþró leiði skriðuna til sjávar. mbl.is/Eggert Jóhannesson

Rýmingu hefur verið aflétt á þeim húsum sem standa fjær varnargörðum á Seyðisfirði, að því er segir í tilkynningu frá Lögreglunni á Austurlandi.

Segir í tilkynningunni að útreikningar á virkni leiðigarða og safnþróar undir óstöðugum hrygg milli stóru skriðunnar frá desember 2020 og Búðarár liggi nú fyrir. Samkvæmt þeim eru allar líkur á að varnargarðar og safnþró leiði skriðuna til sjávar.

Fimm hús sæta enn rýmingu

Rýmingu hefur þó ekki verið aflétt á þeim fimm húsum sem standa næst varnargarðinum þar sem enn mælist hreyfing á hryggnum. Húsin eru Fossgata 5 og 7 og Hafnargata 10, 16b og 18c.

Fram kemur að engar hreyfingar hafi mælst í hlíðum ofan Seyðisfjarðar utan þeirra er mælst hafa í hryggnum.

Frétt af mbl.is

Flekinn fari af stað í smærri brotum

Þá segir að öll óviðkomandi umferð um skriðusvæðið sé óheimil. Umferð um göngustíga meðfram Búðará og og annarsstaðar þar sem varnargarðar beina skriðustraumum verði áfram með aðgæslu.

Herðubreið verður opin á morgun milli 14 og 16. Íbúar í húsunum sem enn sæta rýmingu geta þannig komið og hugað að húsum sínum undir eftirliti og í skamma stund.

Hættustig Almannavarna er enn í gildi.