Morgunblaðið | 19.10.2021 | 9:27

Loftslagsmálin meðal helstu áskorana samtímans

Guðmundur Kristjánsson, forstjóri Brims, segir loftslagsmálin eitt af helstu áskorunum samtímans. mbl.is/Kristinn Magnússon

Sjávarútvegsfyrirtækið Brim hefur í samstarfi við Íslandsbanka lokið við útgáfu skuldabréfa sem falla undir sjálfbæran fjármögnunarramma félagsins og eru kennd við grænan og bláan lit.

„Loftslagsmálin eru ein af helstu áskorunum samtímans og við þurfum öll að bregðast við,“ segir Guðmundur Kristjánsson, forstjóri Brims, í tilkynningu sem birt hefur verið á vef útgerðarinnar en heildarstærð skuldabréfaflokksins er fimm milljarðar króna að nafnverði.

Guðmundur segir að lykillinn að árangri séu stórauknar fjárfestingar í nýsköpun og þróun verkefna á sviði umhverfis- og loftslagsmála. „Þess vegna er mikilvægt að virkja fjármálamarkaðinn til samvinnu við okkur og festa í sessi faglegt verklag sem tryggir að sjálfbærni sé höfð að leiðarljósi við mat á fjárfestingum okkar,“ segir Guðmundur.

Skuldabréfin eru óveðtryggð með lokagjalddaga þann 22. október 2026 og bera 4,67% vexti.