Morgunblaðið | 29.10.2021 | 13:00

Undirrituðu samstarfssamning Hafró og Matís

Þorsteinn Sigurðsson og Oddur M. Gunnarsson við undirritun samningsins. Ljósmynd/MATÍS

Þorsteinn Sigurðsson, forstjóri Hafrannsóknastofnunar, og Oddur M. Gunnarsson, forstjóri Matís, skrifuðu í vikunni undir samstarfssamning sem ætlað er að styrkja og efla samstarf stofnananna um rannsóknir og samnýtingu innviða, að því er fram kemur í tilkynningu á vef Hafrannsóknastofnunar.

Fram kemur að vonir séu um að samkomulagið muni tryggja aðgengi að rannsóknainnviðum og auka samstarf og að í því felist tækifæri fyrir báða aðila. Vísað er meðal annars til örar þróunnar á sviði fiskeldis, erfðafræði og umhverfisbreytinga á Norðurslóðum.

„Gott samstarf stofnananna hefur um langan tíma átt sér stað, allt frá þeim árum sem þær deildu saman húsnæði að Skúlagöu 4 í Reykjavík. Þá hefur einnig mikil og góð samvinna átt sér stað milli Matís og Sjávarútvegsskóla GRÓ sem Hafrannsóknastofnun heftur hýst í fjölda ára. Samningurinn formfestir það góða samstarf auk þess að skapa frekari tækifæri í rannsóknum hafs og vatna,“ segir í tilkynnignunni.