Morgunblaðið | 5.11.2021 | 21:44

Undirbúningur loðnuvertíðarinnar í fullum gangi

Runólfur Runólfsson skipstjóri á Bjarna Ólafssyni AK. Ljósmynd/Síldarvinnslan/Smári Geirsson

Unnið er hörðum höndum víða um land til að gera allt klárt fyrir umfangsmestu loðnuvertíð í tvo áratugi. Mikið skipulag þarf að vera á veiðunum svo hægt verði að ná öllum þeim afla sem útgerðunum hefur verið úthlutað.

Þetta á einnig við Bjarni Ólafsson AK sem liggur við bryggju í Norðfjarðarhöfn. „Ég geri ráð fyrir að við siglum suður til Reykjavíkur á morgun en loðnunótin er þar. Nótin verður væntanlega tekin um borð á mánudagsmorguninn og síðan verður haldið rakleiðis til veiða úti fyrir Norðurlandinu,“ segir Runólfur Runólfsson, skipstjóri á Bjarna Ólafssyni, í færslu á vef Síldarvinnslunnar.

Bjarni Ólafsson AK. Ljósmynd/Hákon Ernuson

„Það skiptir máli að hefja veiðar sem fyrst ef allur sá kvóti sem úthlutað hefur verið á að nást. Menn verða að halda mjög vel á spilunum til að ná kvótanum og nauðsynlegt verður að veiða drjúgan hluta hans fyrir áramót. Stóra spurningin í þessu öllu saman er veðrið. Það viðrar oft ekkert sérstaklega vel þarna fyrir norðan á þessum árstíma og veðurútlitið fyrir næstu viku er ekki gott. Menn verða hins vegar að vera á staðnum og grípa tækifærin í veðurgluggum þegar þau gefast. Það veiðist ekkert ef menn eru ekki til staðar. Þetta mun allt koma í ljós og það þýðir ekkert annað en vera bjartsýnn,“ segir Runólfur.

Fram kemur á vef útgerðarinnar að gert sé ráð fyrir danska uppsjávarskipinu Ísafold komi á loðnumiðin norður af landinu síðar í dag en það má einungis veiða í grænlenskri lögsögu.