Morgunblaðið | 15.11.2021 | 11:22 | Uppfært 12:20

Varðskipið Týr lauk sinni síðustu ferð í dag

Áhöfnin á Tý fór í síðustu ferð með skipinu. Ljósmynd/Landhelgisgæslan

Varðskipið Týr kom til Reykjavíkur klukkan níu árdegis í dag og lauk þar með síðasta úthaldi sínu. Varðskipið Freyja tekur formlega við keflinu þegar Týr kemur til hafnar en Freyja fer í sína fyrstu eftirlitsferð 22. nóvember. Þetta segir Ásgeir Erlendsson, upplýsingafulltrúi Landhelgisgæslunnar, í samtali við Morgunblaðið.

Frétt af mbl.is

Önnur aðalvél Týs er ónothæf

Týr kom í fyrsta sinn til Reykjavíkur 24. mars 1975 og lagðist að Ingólfsgarði. Skipið var þá fullkomnasta skip Íslands og jafnframt það dýrasta en það kostaði um einn milljarð króna. Varðskipið fór sína fyrstu ferð til björgunar- og landhelgisgæslustarfa frá Reykjavík þann 29. mars 1975, undir stjórn Guðmundar Kjærnested , skipherra, og það kom í hlut Eiríks Bragasonar, skipherra, að stýra skipinu í lokaferðinni.

Í byrjun þessa árs var Týr tekinn í slipp í Reykjavík. Við skoðun kom í ljós að vél sem stýrir skrúfubúnaði skipsins var illa skemmd. Jafnframt kom í ljós að tveir af tönkum skipsins voru mikið skemmdir sökum tæringar og var því ekki talið svara kostnaði að gera við skipið.

Um borð í Tý 1975. Sjá má Ólaf Jóhannesson, Pétur Sigurðsson og Guðmund Kjærnested skipherra. mbl.is/Ólafur K. Magnússon

Týr árið 1975. Ljósmynd/Landhelgisgæslan

Síðasti skipsfundurinn. Á myndinni eru: Eiríkur Bragason skipherra, Elvar Már Sigurðsson 3.stýrimaður, Jóhannes Friðrik Ægisson bátsmaður, Anton Örn Rúnarsson 2.stýrimaður, Tinna Magnúsdóttir 1.vélstjóri, Heiður Berglind Þorsteinsdóttir 2.vélstjóri, Gunnar Rúnar Pálsson yfirvélastjóri, Egill Logi Hilmarsson bryti og Einar Ingi Reynisson yfirstýrimaður. Ljósmynd/Landhelgisgæslan