Morgunblaðið | 22.11.2021 | 10:00

Brim skilaði 2,9 milljarða hagnaði

Guðmundur Kristjánsson, forstjóri Brim, kveðst ánægður með hve stöðugur rekstur Brims hefur verið. mbl.is/Kristinn Magnússon

Útgerðarfélagið Brim hf. skilaði 2,9 milljarða króna hagnaði á þriðja ársfjórðungi í ár en á sama tímabili í fyrra var hagnaðurinn 2,3 milljarðar, sem er um 24% aukning. Þetta má lesa út úr árshlutareikningi sem stjórn félagsins hefur samþykkt.

„Rekstur ársfjórðungsins var stöðugur og sambærilegur við sama ársfjórðung síðasta árs. Salan nam 91,6 milljónum evra í samanburði við 80,7 milljónir evra á sama tíma 2020.

EBITDA fjórðungsins lækkar lítillega milli tímabila eða um 0,8 milljónir evra. Hagnaður fjórðungsins eykst milli ára og er 19,9 milljónir evra samanborið við 16 milljónir evra á þriðja fjórðungi ársins 2020. Grunnrekstur er í takt við sama tímabil 2020 en munurinn liggur í söluhagnaði skips,“ sagði í tilkynningu um uppgjörið.

Skuttogarinn Akurey er gerður út af Brim mbl.is/Þorgeir Baldursson

Sóknin á makrílvertíð erfið

Þar segir jafnframt að rekstur botnfisksviðs hafi gengið mjög vel á fjórðungnum og að góð aflabrögð hafi verið í botnfiski og staða á mörkuðum góð. Á sama tíma hafi sóknin á makrílvertíðinni verið erfið og einnig hafi síldveiðar hafist síðar en á árinu 2020. Efnahagur félagsins sé sterkur. Eignir séu um 772 milljónir evra og eiginfjárhlutfallið 47%.

Þá var haft eftir Guðmundi Kristjánssyni forstjóra að afkoma fjórðungsins væri góð og að hann væri ánægður með hversu stöðugur reksturinn er orðinn.

„Undanfarin misseri höfum við markvisst fjárfest í botnfisksaflaheimildum og nýrri tækni sem er að skila árangri í dag. Eins sjáum við að fjárfestingar í sölufélögunum styrkja viðskiptalíkanið okkar. Loðnuvertíð er fram undan og er þetta mesta magn loðnukvóta frá árinu 2003. Við þessa aukningu í úthlutun fór Brim yfir hámarkshlutdeild í þorskígildum,“ sagði hann.