Morgunblaðið | 16.12.2021 | 9:49

Klappir staðfest sem grænt fyrirtæki

„Grænt vaxtarfjármagn gefur okkur tækifæri til að vinna áfram að grænni og sjálfbærari framtíð, vaxa og sækja fram erlendis,“ er haft eftir Jóni Ágústi Þorsteinssyni, forstjóra Klappa. Ljósmynd/Aðsend

Alþjóðlega sjálfbærnifyrirtækið ISS ESG hefur gert úttekt á starfsemi íslenska hugbúnaðarfyrirtækisins Klappa og staðfest að hún sé græn. Matið byggir á því að yfir 90% af tekjum fyrirtækisins kemur frá hugbúnaði þess sem dregur úr losun gróðurhúsalofttegunda (GHL) hjá fyrirtækjum, sveitarfélögum og opinberum aðilum. Slík starfsemi er tilgreind sem græn í flokkunarkerfi ESB (e. EUTaxonomy) en gert er ráð fyrir því að sambærilegar reglur verði settar hér á landi.

Frétt af mbl.is

Vann sjálfbærniverðlaun fyrir Grænskjái

Þetta kemur fram í tilkynningu.

Þar segir að um sé að ræða fyrsta sinn sem starfsemi af þessum toga hljóti slíka staðfestingu frá viðurkenndum aðila líkt og ISS ESG.

„Fyrirtækið hefur um árabil verið leiðandi á sviði hugbúnaðargerðar fyrir sjálfbærniupplýsingagjöf fyrirtækja og stofnana og hefur sem slíkt skapað stafrænt vistkerfi á milli aðila til að deila upplýsingum sín á milli. Vistkerfið auðveldar allt utanumhald um sjálfbærniupplýsingar og hvetur fyrirtæki til að bæta frammistöðu sína útfrá viðmiðum um umhverfi, félagslega þætti og stjórnarhætti (UFS),“ segir í tilkynningunni.