Morgunblaðið | 6.1.2022 | 13:38

Heldur döpur veiði hjá loðnuskipunum

Beitir NK-123 er eina skipið sem tókst að hefja veiðar aðfararnótt þriðjudags. mbl.is/Hafþór Hreiðarsson

Aðfararnótt þriðjudags héldu loðnuskip Síldarvinnslunnar til veiða, en aðeins Beitir NK hóf veiðar um nóttina, að því er fram kemur í færslu á vef útgerðarinnar.

„Líkt og fyrir jólin er næturveiðin heldur döpur. Öll skipin á miðunum köstuðu í gærmorgun og var veiðin yfirleitt svipuð og hún var fyrir jól. Afli dagsins var gjarnan á bilinu 300-500 tonn. Eitt skipanna fékk þó 750 tonn nokkru norðar en hin skipin voru,“ segir í færslunni.

Þá var veðurð að ganga niður norðaustur af landinu í fyrrinótt og gærmorgun er skipin héldu á miðin, en nú er þar skítabræla og voru skipin kölluð inn vegna veðursins til að landa því sem búið var að ná. Heildaraflinn nam 1.200 tonnum og var honum landað á Seyðisfirði.

„Vonast er til að veðrið gangi niður í kvöld og það verði veiðiveður á morgun.“