Morgunblaðið | 7.1.2022 | 21:11

Mikið um kóralþörunga í Veiðileysufirði

Ígulker hafa þótt fínasta afurð en ekki er ráðlegt að stunda ígulkerveiðar þar sem kóralþörungar eru í miklu magni.

Töluvert er af lifandi kóralþörungum í Veiðileysufirði og sunnanverðum Jökulfjröðum sem gera það að verkum að ekki er réttlætanlegt að leyfa ígulkerveiðar á þessum svæðum. Þetta er meðal þess sem fram kemur í skýrlsu um könnun á útbreiðslu skollakopps (ígulkera) í Jökulfjörðum sem birt hefur verið á vef Hafrannsóknastofnunar.

„Greinóttir kóralþörungar mynda afar viðkvæm og fjölbreytilegt búsvæði með hátt verndargildi. Þau eru talin mikilvæg fyrir ungviði nytjastofna og ætti því ekki að stunda plógveiðar á þeim,“ segir í skýrslunni.

Kort sem sýnir staðsetningu tilraunatoganna 1‐12 í Jökulfjörðum. Sýnd eru númer toga, lengd og stefna. Kort/Hafrannsóknastofnun

Könnunin á útbreiðslu tegundarinnar fór fram á 12 stöðum og leiddi í ljós nýtanleg veiðisvæði í Jökulfjörðum. Þá segir að magn skollakopps var mest syðst í Jökulfjörðum um 120 til 230 kíló eftir tíu mínútna tog. „Stærð skollakopps var metin sjónrænt yfir leyfilegri löndunarstærð á öllum stöðvum.“

„Greinóttir kóralþörungar sáust á 7 af 9 stöðvum þar sem myndir voru teknar en í mismiklu magni. Í Veiðileysufirði var mikið um lifandi kóralþörunga og einnig á stöð 10 í sunnanverðum Jökulfjörðum og skildu veiðar því ekki fara þar fram,“ segir í skýrslunni.